Miðlar vunnu!
SSP skrivaði herfyri út kapping millum 10. flokkar í sambandi við árliga átak teirra ‘Tryggari internet dagur’, og varð vinnarin av kappingini í morgun avdúkaður.
Uppgávuorðing teirra ljóðaði soleiðis: ‘Talgildi samleikin: Frælsi at vera eg’.
Lagt varð upp til at gera ein film, ein sang, eitt listaverk, eina heimasíðu ella okkurt annað, ið vísti, hvussu arbeitt varð við evninum.
Teir fýra næmingarnir Petur, Tóki, Dánjal og Martin á Miðla-fakinum í Nám X tóku avbjóðingina til sín, og gjørdu ein stuttfilm og eitt podvarp, har reyði tráður teirra vísti á, hvussu trupult, tað kann vera hjá ungum at reika á internetinum og samstundis at vera trúgvur mótvegis egnum samleika.
Uppskot og avrik teirra vunnu í morgun kappingina, og fingu næmingarnir handaða viðurkenning á lítlari samkomu á Føroya Tele, har Jan Ziskasen, samtaksstjóri á Føroya Tele, Magni Mohr, formaður í Fólkaheilsuráðnum og Óli Rubeksen, leiðari á SSP-ráðgevingini eisini tóku lut, og nýttu allir høvið at rósa ungu næmingunum. Óli Rubeksen helt fyri, at vit nú hava ungar ávirkarar – eisini kent sum influencers – á hesum viðkvæma øki í Føroyum.