Barnarættindadagurin verður hildin 20. novembur fyri at hátíðarhalda, at Altjóða Barnarættindasáttmálin hjá Sameindu Tjóðum (ST) varð undirskrivaður henda dagin í 1989.

Tað var avmarkað luttøka fyri skúlarnar. Einans trý vóru við fyri hvørja deild. Fyri Eysturskúlan luttóku trý næmingaráðsumboð fyri grunddeild, trý umboð úr miðdeild og trý úr hádeild. Við teimum í Norðurlandahúsinum vóru vegleiðarar teirra, Árant, Susan og Joan.

Yvirskipaða endamálið við degnum var at geva næmingaráðsumboðunum ein virknan leiklut í fólkaræðnum. Tey skuldu læra at fáa ávirkan á viðurskifti, ið eru viðkomandi fyri tey.

Barnarættindasáttmálin, er ein avtala millum lond, sum hava lovað at verja rættindi barnanna. Barnarættindasáttmálin greiðir frá, hvat eitt barn er,  øllum rættindum teirra og ábyrgdini hjá stjórnunum.

Høvuðsevnið fyri dagin var grein 12 í barnarættindasáttmálanum: Virðing fyri meiningum hjá børnum.

Landsstýrismaðurin í Barna- og útbúgvingarmálaráðnum hevur, saman við landsstýrisfólkunum í Heilsumálaráðnum, Løgmálaráðnum, Almanna- og mentamálaráðnum og formansskapinum í Kommunufelagnum, tikið stig til at orða eina framskygda visión um at skapa bestu karmarnar um eitt gott lív hjá børnum og ungum í Føroyum. Tann sonenvda Barnaverkætlanin.

Endamálið við degnum var at fáa næmingarnir at skilja barnarættindini, at fáa tey at forvitnast í, hvat tað merkir at koma fram við sjónarmiðum sínum.

Skipað var fyri kreativum verkstovum, har børnini á fjølbroyttan hátt viðgjørdu rættindini, sum børn hava.

Tað er Barnaverkætlanin í samstarvi við Undirvísingarstýrið, Nám, Barnabata og Barnaumboðsmannin, sum hevur staðið fyri tiltakinum, sum lesandi á Námsvísindadeildini á Setrinum, eisini hjálptu við til.  

Eitt gott og gagnligt átak.